მოგესალმებით,
ვფიქრობ შევხვედრივართ. მე ევროპელი ვარ, მომავლის ევროპელი! ან ევროპელი მომავლიდან,
როგორც გენებოთ. საკმაოდ მრავალფეროვან გარემოში ვცხოვრობ. ჩემ გარშემო უამრავი კულტურის
მქონე ადამიანები ირევა. ზოგიერთი მათგანი დედამიწის მეორე ნახევრიდან ჩამოვიდა ჩვენთან
საცხოვრებლად. მშვენიერი მეზობლები ვართ, ერთმანეთს ხახვსაც ვუწილადებთ და მაღაზიაშიც
ვეგზავნებით, თუ საჭიროა. სხვათაშორის, საკუთარი უკაბელო ინტერნეტის პაროლებსაც ვუმხელთ
ერთიმეორეს. მგონი ახლა ცხადია თუ რაოდენ დიდი სიყვარულია ჩვენ შორის. აი თუნდაც, ჩემი
თანაკლასელი აზიიდან არის. მისი კულტურა ძალიან განსხვავდება ჩვენი კულტურისაგან, თუმცა
ეს არაფერს ნიშნავს, პირიქით სასიამოვნოც კია პატარ-პატარა მსგავსებების აღმოჩენა და
ინფორმაციის მიმოცვლა. მისგან ბევრი რამ ვისწავლე. მიუხედავად იმისა, რომ სხვადასხვა
მშობლიური ენები გაგვაჩნია ამით არანაირი დისკომფორტი იქმნება. უმეტესად ერთ ენაზე
ვსაუბრობთ, თუმცა ხშირად გვიწევს ერთმანეთს მშობლიურ ენაზე მოლაპარაკეებს ვუსმინოთ,
შესაბამისად ჩვენი უცხოური ლექსიკა სწრაფად მდიდრდება. რამდენჯერმე ამ უცხოური სიტყვების
მარაგით აღმოსავლელ ტურისტსაც კი დავეხმარე გზის გაგნებაში! მოკლედ რომ გითხრათ, ძალიან
განსხვავებულები ვართ და სწორედ ეს არის ჩვენ მეგობრობაში ყველაზე მომხიბვლელი და საინტერესო.
ახლახანს ახალი პროექტი წამოვიწყეთ მე და
ჩემმა მეგობრებმა. ვგეგმავთ, რომ ლაშქრობები მოვაწყოთ და გზად შეხვედრილი ნარჩენები
შევაგროვოთ. გვსურს, ჩვენს სახელზე ხეები დავრგოთ და გარემოს დაცვაში საკუთარი წვლილი
შევიტანოთ. ჩემი აზრით, რთულია კაცობრიობა სწრაფი ტემპით ვითარდებოდეს და ამავდროულად
გარემოს არ აბინძურებდეს. დიახ, ნამდვილად რთულია, თუმცა არა შეუძლებელი და ზუსტად
ამის მიღწევაა ჩვენი მიზანი.
სკოლაში ძალიან ბევრი მეგობარი მყავს. იმის
მიუხედავად, რომ სხვადასხვა შეხედულებები გაგვაჩნია, ყოველთვის ვცდილობთ ერთმანეთის
მოსაზრებები გავიზიაროთ. მაგალითისთვის, ზოგიერთი ჩვენგანი განსხვავებული რელიგიური
მრწამსის მიმდევარია, მაგრამ ეს არასდროს აჩენს ერთმანეთის მიმართ უარყოფით დამოკიდებულებას.
ალბათ ყოველივე ახალი და განსხვავებული ადამიანში ერთგვარ შიშს იწვევს, თუმცა უნდა
გავიაზროთ რამდენად საფუძვლიანი და ლოგიკურია ჩვენი შიში, რამდენად უშლის ის ხელს ახალი
იდეეების წარმოშობას, სურვილის გაღვივებას, რომ სხვადასხვა თავგადასავლებსა თუ გამოწვევებს
შევეჭიდოთ და რამდენად გვამწყვდევს ერთ დიდ უცვლელ კომფორტის ზონაში, რომლისგანაც თავის
დაღწევა დროდადრო უფრო რთული ხდება. ხოლო, როგორც კი ამ მყუდრო ოთახიდან გამოვაღწევთ,
მაშინვე ვხედავთ, როგორი უსაფუძვლო იყო ჩვენი შიში და რამდენად უფრო მშვენიერია იმ
ოთახის კარებს მიღმა არსებული სამყარო.
ხშირ შემთხვევებში სწორედ ამ განსხვავებულობის
მიუღებლობისა და შიშის გამო, ადამიანები ჩაგრავენ, როგორც ფიზიკურ, ისე ფსიქოლოგიურ
ზეწოლას ახდენენ სხვებზე და ამ ყველაფრით მათ უფლებებს უხეშად ეხებიან. ეს ფაქტი ჩემთვის
ძალზედ სამწუხაროა და ვცდილობ მსგავსი ინციდენტების დროს მაქსიმალურად სწორი გადაწყვეტილება
მივიღო, ხმა ამოვიღო და დავეხმარო ადამიანებს, რომლებიც ასეთი მოპყრობის მსხვერპლნი
არიან.
ევროპა
არის გარანტი იმისა, რომ შენ იცხოვრებ თავისუფალ, თანასწორ, სამართლიან, დემოკრატიულ
და სოლიდარულ გარემოში, სადაც თამამად გამოთქვამ საკუთარ აზრს, სადაც თითოეული მოქალაქის
უფლებები იქნება დაცული, სადაც არ გესვრიან ტალახს შენი კანის ფერის გამო, სადაც არ
გჩაგრავენ იმიტომ, რომ შენ განსხვავებული ხარ, ადგილი სადაც ცხოვრება არის სრული კომფორტი
და ბედნიერება!
სსიპ
ვლადიმირ კომაროვის თბილისის ფიზიკა-მათემატიკის N199 საჯარო სკოლის
მე-10 (მე-7) კლასის მოსწავლე
მარიამ ჯაფარიძე
